Day: August 25, 2021

Darling Cellars se gunstelinge nou in 2 liter beskikbaar

Darling Cellars bied nou ook hul bekroonde wyne aan in ‘n gerieflike nuwe 2L slimline-boks.
Die nuwe 2L BiB’s (Bag in Box) van Darling Cellars is om tred te hou met die verbruikers se behoefte aan waarde vir geld sonder om afbreuk te doen aan smaak of kwaliteit, teen bekostigbare pryse.
Die nuwe slimline-boks pas ook maklik in die syrakkie van die yskasdeur en die wyn bly ook langer vars (tot 4 weke in die yskas).
Hierdie nuwe 2L BiB’s is beskikbaar by Darling Cellars se proelokaal, Makro, PnP, Spar/Tops en ander onafhanklike drankwinkels teen mededingende pryse

Stand van die damme

Die vlak van die damme in die watervoorsieningsnetwerk van die Wes-Kaap staan nou op 98.9% van die kapasiteit. Dit is ‘n verandering van 0.8% teenoor verlede week.
Die Bergrivierdam was Maandag 100.4% vol in vergelyking met verlede week se 100.2%.
In 2017, tydens die droogte wat die Wes-Kaap ervaar het, was die dam 53% vol.
Die Laer-Steenbrasdam was Maandag 91.4% vol, in vergelyking met verlede week se 90.5% en 2017 se 30.3%.
Die Theewaterskloofdam het Maandag die 102.1%-kerf bereik, in vergelyking met verlede week se 101.8% en 2017 se 25.6%.
Die Voëlvleidam, die Swartland se enigste bron van water, was Maandag 92% vol. Dit is ‘n 0.3% styging vanaf verlede week. In 2017 was die dam 23.6% vol op dieselfde tydstip.
Weerkenners voorspel dat ‘n kouefront teen Donderdag die Wes-Kaap sal bereik wat swaar neerslae en moontlike sneeu sal bring.
Bron: www.capetown.gov.za

Entstowwe, maskers en teorieë oor Covid in 2021

Wat is ’n entstof? ’n Entstof word gebruik om jou immuunstelsel te op lei om in die toekoms ’n infeksie te kan hanteer en dit te beveg.
Wat is bevolkingsimmuniteit? Bevolkingsimmuniteit word bereik wanneer baie mense ingeënt is en ’n infeksie dan sukkel om iemand te vind wat kan siek word. Wanneer ’n siekte baie vinnig kan versprei, moet meer mense ingeënt word om bevolkingsimmuniteit moontlik te maak.
Is daar ’n entstof vir COVID-19? Ja. In Suid-Afrika is die eerste twee entstowwe wat beskikbaar sal wees die Johnson & Johnson-entstof en die Pfizer/BioNTech-entstof. Ander entstowwe kan ook gebruik word soos meer bevindinge beskikbaar word. Alle entstowwe is deeglik getoets vir veiligheid.
Oor die entstof
Hoe sal die entstof gegee word? Jy sal ’n inspuiting in jou boarm kry. Sommige entstowwe het twee dosisse nodig wat ten minste drie tot vier weke uitmekaar gegee word vir die beste beskerming (bv. een inspuiting in September en nog een in Oktober). Die Johnson & Johnson-entstof word net in een dosis gegee. Is COVID-19-entstowwe veilig? Alle COVID-19-entstowwe wat gebruik word, is verskeie kere getoets om veiligheid te verseker en is spesiaal geskep om te kyk vir enige algemene neweeffekte en veiligheidskwessies, insluitend die dominante COVID-19-variant in Suid-Afrika, genaamd 501Y.V2. Hierdie toetse het mense ingesluit wat ’n hoë risiko vir COVID-19 het, maar die entstof is nog nie genoeg getoets om veiligheid in swanger vroue en kinders te verseker nie. Meer studies word uitgevoer om uit te vind of die entstowwe veilig is vir swanger vroue en kinders.
Wat is die newe-effekte? Die newe-effekte is pyn en rooiheid in die boarm waar jy ingespuit is, hoofpyn, en om siek, moeg en koorsig te voel. Dit beteken net dat jou liggaam voorberei word om die virus in die toekoms te beveg. Hierdie newe-effekte is gewoonlik erger na een dag en verdwyn binne vier tot vyf dae. Jy kan parasetamol of ’n anti-inflammatoriese middel gebruik as jy moet.
Hoe is die entstof so gou gemaak? Ondervinding met die SARS- en MERSuitbreking (albei deur koronavirusse veroorsaak), vinniger vervaardiging, befondsing vir veelvuldige proewe en reguleerders wat vinniger as voorheen beweeg, het die proses baie vinniger laat geskied. Niks is afgeskeep nie, en die proewe wat veiligheid en doeltreffendheid toets, is net so streng soos dit voorheen was vir ander.
Het ek die entstof nodig as ek al COVID-19 gehad het? Ja, jy moet steeds ingeënt word as jy reeds COVID-19 gehad het of as jy ’n positiewe teenliggaamtoets gehad het. Ons weet tot dusver dat die natuurlike immuniteit wat jy kry as jy COVID-19 gehad het dalk nie sal aanhou nie. Die inenting sal enige reaksie versterk wat jou immuunstelsel in plek stel na ’n vorige koronavirus-infeksie.
Dit is belangrik dat diegene wat wel ingeënt is teen die virus, steeds onderhewig is aan die landswette wat bepaal dat jy in die publiek ‘n masker moet dra wat jou mond en neus bedek.
Al is jy ten volle ingeënt, kan deurbraak infeksies steeds plaasvind. (Bron: westerncape.gov.za)

Kwekery-kundiges gee raad oor Boomplantmaand

Dit is alweer September en tradisioneel vir ons Boomplantmaand.
Vir vanjaar (2021) is die volgende bome gekies as boom van die jaar:
1) Vachellia Karroo “Soet Doringboom”
2) Portulacaria Afra “Spekboom”
Indien jy nie een van hierdie spesies kan vind nie, plant enige boom van jou keuse en wat aan jou spesifieke omstandighede en behoeftes kan voldoen. Ons moet onthou die hoofdoel van bome plant is om ‘n groen fabriek daar te skep wat die baie koolsuurgas kan omsit in suurstof en sodoende laat ons ‘n groen voetspoor na.
Wanneer jy ‘n boom (of selfs ‘n groot struik) moet kies om te plant, is daar ‘n paar dinge waarna jy moet kyk:
Hoe groot gaan die boom word. Het ek genoeg plek? Daar is baie bome om van te kies, party groei;
• dun en piramidaal,
• groot en rond
• hoog mat ‘n plat kroon (bv. Doringbome).
Is die boom immergroen of bladwisselend want dit gaan ook bepaal of dit aan jou behoeftes sal voldoen. Indien jy skaduwee in die somer soek en son in die winter (soos bv. voor ‘n venster of skuifdeur wat Noord front) dan sal ‘n bladwisselende boom perfek wees.
Op ‘n grasperk is ‘n bladwisselende boom ook ‘n beter keuse, sodat dit die meeste winterson kan deurlaat, omdat die meeste grasperke nie in skaduwee suksesvol groei nie.
Hoe gaan die boom se wortels die onmiddellike omgewing beïnvloed? Daar bestaan ongelukkig geen waarborg vir enige boom se wortel-groei nie. Boomwortels groei eerstens agter water aan.
Begin deur die plantgat van die boom reg voor te berei, want dit is die boom se fondament (kom kry by die kwekery ‘n pamflet met al die inligting). Gee die boom genoeg water waar dit geplant is, anders gaan hy dit elders met sy wortels soek.
Voorspoed met die uitsoek van jou spesiale boom, lekker tuinmaak. Ons gesels weer 29 September 2021.
Tuingroete en geniet Lentedag!!
George Retief