Hierdie tyd van die jaar is dit baie warm en net soos ons mense, kry die tuinplante ook swaar. Daar is ook hierdie tyd van die tuinmaak-kalender heelwat dinge waaraan ons tuiniers aandag moet skenk:
Wees op die uitkyk in jou roostuin (ook elders in die tuin) vir Rooispinmyt-besmetting. Die eerste tekens van dié plaag is so ‘n vaalgrys, gespikkelde, sout-en-peper-voorkoms op die bokant van die blaar en as jy die blaar aan die onderkant bekyk, sien jy die mikroskopiese klein insekte beweeg.
Soms is daar ook ‘n baie fyn spinnerakweb sigbaar tussen die takkies en die blaar. Dié plaag suig plantsap uit die plant en plaas plante onder baie stres en kan op die langduur die plant heeltemal dood maak. Dit is ‘n plaag wat gewoonlik gepaardgaan met warm, droë, stowwerige toestande en kan nogal baie skielik toeslaan en vinnig versprei (veral dié tyd van die jaar).
Om dit te beheer, moet jy weekliks ‘n baie deeglike bespuiting doen van die plante, veral aan die onderkant van blare vir ten minste 4-5 weke. Gebruik ‘n erkende middel teen rooispin-myte. Gebruik ook ‘n goeie kleefmiddel om te help met die verspreiding van die produk.
Dié tyd van die jaar kan jy jou rose ook ‘n ligte somersnoei gee om weer nuwe groei te bevorder, moet net nie te swaar snoei dat daar te min blare oorbly om die stamme teen sonbrand te beskerm nie.
Rose benodig baie water en gereelde voeding. Moenie kortpaaie vat nie, want dan gaan jy nie mooi, gesonde plante met baie blomme hê nie. Daar is ‘n verskeidenheid van voeding vir rose op die mark, gebruik dié met ‘n hoë kalium inhoud vir baie en mooi blomme, maar ook genoeg stikstof vir mooi gesonde, blare (3.1.5; 8.1.5; Vigorosa 5.1.5; 1-for-all 13.3.8)
Op die oomblik sukkel ons tuiniers ook weer met ‘n taamlike aggressiewe besmetting van sitruswitvlieg (woolly whitefly aphid), wat veral suurlemoenbome, maar ook alle ander sitrus-spesie, aanval.
Dié plaag kom ook op die onderkant van die blare voor en die heuningdou wat die goggas afskei, maak die blare taai en later raak die boom pikswart soos die “black soot” op die blare versamel.
Hier moet met ‘n kombinasie van twee giwwe gespuit word, eerste week 2 tot 3 keer en daarna nog omtrent vir nog 4 tot 5 weke, een keer per week, of tot die plaag uitgeroei is.
Ons gebruik die Makhro Siezer 100ec, plus SK ECO oil spray of Oleum in kombinasie (jy meng die twee saam) en weer eens moet die bome deeglik onder hul blare gespuit word.
Ten slotte: ek sien so baie tuiniers wat hul tuine natspuit met die tuinslang sonder dat hulle ‘n lekker sagte spuitkop gebruik. Die straal water wat uit die pyp kom, spoel dat die grond so spat, party gebruik ‘n vinger voor die pyp om kamma die water te breek, maar nog steeds spoel die plante se wortels kaal.
Asseblief, vir die plante se onthalwe, gebruik ‘n ordentlike spuitkop of sit ‘n klein “skilpad-spuit” op die grasperk of langs die bedding sodat die plante ‘n lekker sagte sproei kan beleef.
Tuingroete tot 23 Februarie
George Retief