CK spog met beste eenheid in veediefstal in Wes-Kaap

Die Wes-Kaap Veediefstalkomitee wat onder die RPO Wes-Kaap resorteer, maak jaarliks toekennings aan die Beste Lid van ‘n Veediefstaleenheid en die Beste Veediefstaleenheid in die provinsie. Agri Wes-Kaap se Landelike Veiligheidsbeleidskomitee gee ook jaarliks ‘n toekenning aan die Beste Landelike Veiligheidskoördineerder. Al die toekennings is tydens Agri Wes-Kaap se jaardinee op 25 November oorhandig.
Beste Veediefstaleenheid
Die toekenning gaan vanjaar aan die Malmesbury Veediefstaleenheid. Die eenheid bestaan uit 10 lede en twee administratiewe personeel. Die waarnemende bevelvoerder is Adjudant-Offisier Rudi Lourens. Tussen 1 April 2019 en 31 Maart 2020 het die Eenheid 284 sake ontvang en ‘n 71% oplossyfer gehad. Dit het onder meer bestaan uit 175 veediefstalsake met 65 arrestasies en 9 gevalle van bedreigde spesies diefstal met 15 arrestasies. Van 79 aangemelde grootvee-diefstal is 72 teruggekry, van 518 aangemelde kleinvee-diefstal is 101 teruggekry, van 73 aangemelde varkdiefstal is 25 teruggekry en van 15 aangemelde pluimvee-diefstal is 11 teruggekry.
Jaco van den Berg, voorsitter van die Wes-Kaap Veediefstalkomitee, sê veediefstaleenhede is krities belangrike rolspelers in die veebedryf.
“Ons vereer graag die Malmesbury Veediefstaleenheid vir hulle uitsonderlike diens aan ons produsente en die sektor. Die Malmesbury-eenheid se suksesse spreek van harde werk en hulle lojaliteit aan die produsente in die gebied wat hulle bedien, help om die landbousektor te versterk. Ons het groot waardering vir die goeie samewerking wat ons met die Eenheid het.”
Beste Lid van ‘n Veediefstaleenheid
Vanjaar is die toekenning vir die vierde agtereenvolgende jaar aan Sers TS Moletsane van die Beaufort-Wes Veediefstaleenheid gemaak.
In die 2019/2020 finansiële jaar het Sers Moletsane 58 sake ondersoek waarvan 45 met 66 inhegtenisnemings in die hof gaan draai het. In 34 van die 45 sake wat hof toe is, is skuldigbevindings bereik. Luitenant-Kolonel Johan Smit, Wes-Kaapse koördineerder van veediefstal van die SAPD, sê Sers Moletsane is ‘n gedissiplineerde, toegewyde, gedetermineerde en hardwerkende lid. Hy respekteer altyd die klaers, verdagtes, aangeklaagdes, hofbeamptes, ander lede en sy senior kollegas. Hy kom altyd besonder goed voor en mense bewonder sy vermoëns, sy dissipline en sy entoesiasme om sake op te los.
Optrede wat deur hom uitgevoer word, word altyd behoorlik beplan en uitgevoer binne die kortste tydsraamwerke, met min hulpbronne en uitgawes. Ondersoeke wat deur hom gedoen word, word behoorlik en buitengewoon goed gedoen om te verseker dat sake op hofrolle geplaas word en om skuldigbevindings te verseker. Hy besef sy doelstellings en verantwoordelikhede en gee net sy beste om sy doelwitte te bereik.
Hy glo in wat hy doen en is trots om met die eenheid verbind te word. Hy is altyd bereid om veel verder te gaan as die pligte wat van hom verwag word. Hy is altyd bereid om te help, ongeag watter tyd van die dag of nag. Hy huiwer nooit om na ure en vir lang tydperke te werk sonder vergoeding of enige klagtes nie. Hy is altyd bereid om sy kollegas by te staan. Hy sal nooit ‘n misdaadtoneel of die prosessering van beskuldigdes verlaat om huis toe te gaan voordat al die werk voltooi is nie.
Hy is voortdurend op soek na geleenthede om sy kennis op sy huidige gebied uit te brei, omdat hy daarna streef om ‘n kundige te wees oor die onderwerp van veediefstal. Hy het ‘n wye kennis van die wet en rig elke ondersoek daarvolgens. Vanweë die manier waarop hy hom teenoor die publiek, ander lede, aanklaers, prokureurs en landdroste gedra, word hy dikwels geprys vir sy professionaliteit. Jaco van den Berg, voorsitter van die Wes-Kaap Veediefstalkomitee, sê Sers Moletsane se toewyding aan veeprodusente verdien erkenning. “Ondersoekbeamptes van sy kaliber is ‘n aanwins vir die landbousektor. Ons het net die hoogste agting en respek vir die erns waarmee hy sy werk doen.”